作曲 : Ozseb Aron Toth

Systema: dactylicus hexameter

Omnia mūtantur, nihil interit: errat et illinc

hūe venit, hinc illūc, et quōslibet occupat artūs

spīritus ēque ferīs hūmāna in corpora trānsit

inque ferās noster, nec tempore dēperit ūllō,

utque novīs facilis signātur cēra figūrīs

nec manet ut fuerat nec fōrmas servat eandem,

sed tamen ipsa eadem est, animam sīc semper eandem

esse, sed in variās doceō migrāre figūrās.

Ergō, nē pietās sit victa cupīdine ventris,

parcite, vāticinor, cognātās caede nefandā

exturbāre animās, nec sanguine sanguis alātur!

Et quoniam magnō feror aequore plēnaque ventīs

vēla dedī: nihil est tōtō, quod perstet, in orbe.

Cūncta fluunt, omnisque vagāns fōrmātur imāgō;

ipsa quoque adsiduō lābuntur tempora mōtū,

nōn secus ac flūmen; neque enim cōnsistere flūmen

nec levis hōra potest: sed ut unda inpellitur undā

urguēturque prior veniente urguetque priōrem,

tempora sīc fugiunt pariter pariterque sequuntur

et nova sunt semper; nam quod fuit ante, relictum est,

fitque, quod haud fuerat, mōmentaque cūncta novantur.